नेपालगञ्ज/बासकी पूर्ब केन्द्रीय सदस्य रुक्मिणी शाहको १४ औं बार्षिक पूण्यतिथीमा बासले बिरामी एक बालिकालाई सहयोग गरेको छ ।
बासद्वारा नेपालगञ्जमा बैशाख २७ गते सम्पन्न बार्षिक पूण्यतिथी कार्यक्रममा नेपालगञ्ज उपमहानगरपालिका वडा नम्वर १० निवासी १६ बर्षिय प्रकृति महतोलाई नगद दश हजार सहयोग गरिएको हो ।
शाहको सम्झनामा बासले स्थापना गरेको रुक्मिणी स्मृति अक्षय कोषबाट उक्त सहयोग प्रदान गरिएको हो ।
कार्यक्रममा महतोकी आमा रेश्मा महतोलाई सहयोग रकम दश हजारको चेक हस्तान्तरण गरिएको थियो ।
महतोलाई बासकी केन्द्रीय अध्यक्ष लुना बुढाथोकी र कार्यकारी निर्देशक नमस्कार शाहले संयुक्त रुपमा चेक हस्तान्तरण गरेका थिए ।
फोक्सोमा पानी जमेर हालै भारतको नयाँ दिल्लि स्थित करुणा अस्पतालमा शल्यक्रिया भई उपचारकै क्रममा रहेकि प्रकृतिको उपचारमा सहयोग पुर्याउने हेतुले उक्त सहयोग गरिएको हो ।
बास नेपालका पूर्ब केन्द्रीय अध्यक्ष मन भण्डारीले सञ्चालन गरेको कार्यक्रममा शाहको सम्झनामा एक मिनेट मौनधारण गर्नुका साथै शाहको तस्विरमा अविर र पुष्प अर्पण गरिएको थियो ।
कार्यक्रममा बास नेपालका कार्यकारी निर्देशक तथा रुक्मिणीका दाजु नमस्कार शाहले पूर्ब केन्द्रीय सदस्य रुक्मिणी शाहको व्यक्तित्वका बारेमा बोल्दै रुक्मिणी स्मृती अक्षय कोषबाट भईरहेको सहयोग बारे जानकारी गराएका थिए ।
कार्यक्रममा बोल्दै बास नेपालका निबर्तमान केन्द्रीय अध्यक्ष रमेश सिटौलाले अनुशासित, ईमान्दार रुक्मिणीको अभाव बासमा सधैं भईरहने बताए । कार्यक्रममा बोल्दै बास नेपालका केन्द्रीय उपाध्यक्ष शिब कुमार बर्माले शाहले संस्थालाई दिएको महत्वपूर्ण योगदान बारे चर्चा गरे । उनले शाहको सम्मानमा स्थापित रुक्मिणी स्मृती अक्षय कोषमा ५ हजार सहयोग गर्ने प्रतिबद्धता जनाए ।
कार्यक्रममा बास नेपालका पूर्ब केन्द्रीय सहसचिव बिबेक पराजुलीले शाहसँगै बिभिन्न अभियानहरुमा संलग्न भएको स्मरण गरे । उनले भने–घटना घटेको हिँजो जस्तै लाग्छ, १४ बर्ष बितेछ पत्तै भएन । कार्यक्रममा बास नेपालकी कोषाध्यक्ष कल्पना अधिकारीले शाहको योगदान अबिश्मरणीय रहने बताईन् । बास नेपाल बाँके शाखाका पूर्ब उपाध्यक्ष रोशन अलि अन्सारी, बास नेपालकी सदस्य खिमा थापा लगायतले शाहको व्यक्तित्व बारे चर्चा गरेका थिए ।
कार्यक्रम समापन गर्दै बास नेपालकी केन्द्रीय अध्यक्ष लुना बुढाथोकीले शाहको सम्मान, स्मृतीमा बासले अक्षय कोष स्थापना गरि अघि बढेको उल्लेख गरिन् । उनले अक्षय कोषलाई बृद्धि गर्दै लैजाने प्रतिबद्धता व्यक्त गरिन् ।
कार्यक्रममा बास नेपालका पदाधिकारी, सदस्य, स्वयंसेवक, कर्मचारीहरुको उपस्थिती रहेको थियो ।
पुण्यतिथीमा सामाजिक कार्य :
शाहको पूण्य तिथीमा बिभिन्न सामाजिक कार्यहरु बासले गर्दै आएको छ । २०६६ देखि हाल सम्म बिभिन्न कार्यहरु गर्दै आएको हो ।
पहिलो, दोश्रो र तेस्रो बार्षिक पूण्य तिथीमा कार्यक्रम गरि शाहको व्यक्तित्व बारे चर्चा गरि सम्झना गरेको बासले चौथो पूण्य तिथीमा २०६९ बैशाख २७ गते नेपालगन्ज स्थित भेरी बृद्धाश्रममा रहेका बृद्ध बृद्धाहरुलाई फलफुल वितरण गरेको थियो, पाँचौं बार्षिक पूण्यतिथीमा २०७० बैशाख २७ गते शाहको स्मृतीमा रुक्मिणि स्मृति अक्षय कोष स्थापना गरिएको थियो । त्यसैगरी २०७१ बैशाख २७ गते शाहको छैटौं पूण्यतिथीमा बासले भेरी बृद्धाश्रम नेपालगञ्जमा फलफुल बितरण गरेको थियो ।
२०७२ बैशाख २७ गते सम्पन्न सातौं पूण्यतिथीमा बासले बागेश्वरी मन्दिरमा रहेका अशक्त, अपाँगता भएका व्यक्ति तथा जेष्ठ नागरिकहरुलाई फलफुल बितरण गरेको थियो भने २०७३ बैशाख २७ गते सम्पन्न आठौं बार्षिक पूण्य तिथीमा बासले साविकको मोतिपुर गाविस वडानम्बर ६ मटेरिया बर्दिया स्थायी घर भई हाल नेपालगञ्ज बस्दै आएकि घरेलु हिँसा पीडित सीतारानी चौधरीकी छोरी १६ बर्षिया छोरी सरस्वती चौधरीलाई स्टेशनरी सहयोग हस्तान्तरण गर्नुका साथै कक्षा ९ र १० पढ्दा लाग्ने सबै शुल्क बासद्धारा सहयोग गरिएको थियो ।
२०७४ बैशाख २७ मा सम्पन्न नवौं बार्षिक पूण्यतिथीमा बासले निल सागर बृद्धाश्रम नेपालगञ्जमा आश्रित जेष्ठ नागरिकहरुलाई दैनिक उपभोग्य खाद्यान्न सामाग्रिहरु हस्तान्तरण गरेको थियो । त्यसैगरी २०७५ बैशाख २७ गते सम्पन्न शाहको १० औं बार्षिक पूण्यतिथीमा बासले बाँके सीतापुर माईती घर भई बर्दिया ठाकुरद्धारा घर भएकी ब्रेन ट्युमर रोग पीडित लक्ष्मी शाहीलाई उपचार सहयोगार्थ ५ हजार सहयोग हस्तान्तरण गरेको थियो ।
त्यसैगरी २०७६ बैशाख २७ गते सम्पन्न शाहको ११ औं बार्षिक पूण्यतिथीमा बासले नेपालगञ्ज वडानम्वर १९ मा बिर बहादुर माझिको संरक्षकत्वमा रहि नेपालगञ्जको होप ईन्टरनेशनल एकेडेमि स्कुलमा अध्ययनरत १३ बर्षिय बिशाल बिष्टलाई अध्ययनका लागि रु. ५ हजार सहयोग प्रदान गरेको थियो भने नेपालगञ्ज वडानम्वर २० की घरेलु हिंसा पीडित महिला गंगा सुनारलाई व्यवसाय सञ्चालन गर्नका लागि रु. ५ हजार सहयोग गरेको थियो ।
यसैगरी १२ औं बार्षिक पूण्यतिथीमा बासले जानकी गाउँपालिका वडानम्वर २ भैयापुर निवासी नेपाल प्रेस ईन्स्टिच्युट, क्षेत्रिय सञ्चार स्रोत केन्द्रमा कार्यरत स्वर्गिय गंगा फुयाँलकी धर्म पत्नीसंगिता फुयाँल र खजुरा गाउँपालिका वडानं ६ उढरापुर निवासी दृष्टिबिहिन जय बहादुर बिश्वकर्मालाई खाद्यान्न सामाग्रि सहयोग गरेको थियो ।
उनीहरुलाई २५ किलो चामल, साढे २ किलो दाल, २ किलो नुन, २ लिटर तेल लगाएत खाद्यान्न सामाग्री सहयोग गरिएको थियो ।
यसैगरी गत बर्ष १३ औं बार्षिक पूण्यतिथीमा बासले पूर्ण अपाँगता भएकी सुनिता बुढालाई नगद पाँच हजार सहयोग गरेको थियो । बुढाको संरक्षण गरिरहेकी नेपालगन्ज– १८ निवासी समाजसेवी बसन्ती शर्मालाई सहयोग रकम पाँच हजारको चेक हस्तान्तरण गरिएको थियो । यसैगरी बार्षिक पूण्यतिथी कार्यक्रममा नेपालगन्ज स्थित निल सागर सेवाश्रमलाई ५० किलो नुन सहयोग प्रदान गरिएको थियो । सहयोग निल सागर सेवाश्रमका प्रतिनिधि दिवाकर खत्रीले ग्रहण गरेका थिए ।
यसका अलावा शाहको सम्झनामा स्थापित अक्षयकोषबाट उनको जन्म दिन र पूण्यतिथीमा अशक्त, अपाँगता भएका व्यक्ति, आर्थिक अभाब भएका बालबालिका, जेष्ठ नागरिक, हिँसामा परेका महिलाहरुलाई बिभिन्न सहयोग प्रदान गरिदै आएको छ ।
स्मरण रहोस् २०६५ बैशाख २७ गते खासकाँरकाँदौमा बास पूर्ब केन्द्रिय सदस्य रुक्मिणी शाहका पति लगाएतले उनको दिउसै हत्या गरेका थिए । पूनरावेदन अदालतले अभियुक्तलाई सर्वश्व सहित जेल सजायको फैसला गरिसकेको छ ।
