हुम्ला , भदौ १३ गते/ खाद्य व्यवस्था तथा व्यापार कम्पनी लिमिटेडले काठामाडौबाट रसुवाको केरुङ नाका हुँदै तिब्बती मार्ग भएर आएको खाद्यान्न हिल्सामा आइपुगेको छ । खाद्यान्न लोड भएका गाडीहरूले केरुङबाट तिब्बती मार्ग हुँदै चीनको ताक्लाकोटबाट हिल्सा आई पुग्न तीन दिन लगाएका हुन ।

हुम्लाका लागि खाद्यान्न बोकेका चालीस वटा गाडी मङ्गलबार बेलुका हिल्सा आइपुगेको लिमिटेड सिमकोट शाखाका प्रमुख कृष्णप्रसाद अधिकारीले बताउनुभयो । तीन दिन अगाडि खाद्यान्न लोड भएका ४० गाडी काठमाडौँबाट छुटेका थिए । जिल्लामा खाद्यान्नको समस्या भएको बेला लिमिटेडले चार हजार क्विन्टल खाद्यान्न पैदल मार्गबाट पठाएको हो ।

लिमिटेड हुम्ला शाखाका प्रमुख अधिकारीका अनुसार जिल्लामा खाद्यान्न समस्या देखिएको बेला केरुङ नाका हुँदै तिब्बती मार्गबाट हिल्सादेखि सिमकोटसम्म चार हजार क्विन्टल खाद्यान्न हिल्सा आइपुगेको बताउनुभयो । उक्त  खाद्यान्न अब  सिमकोट ढुवानी गर्ने तयारी भइरहेको छ । उक्त खाद्यान्नमध्ये एक हजार क्विन्टल नाम्खा गाउँपालिकाको केन्द्र याल्वाङ बिक्री केन्द्रका लागि र तीन हजार क्विन्टल सिमकोट शाखाको लागि ढुवानी हुनेछ । सो खाद्यान्न अघिल्लो आर्थिक वर्षको खाद्यान्न हो । खाद्यान्न सिमकोट पुगे लगत्तै सर्वसाधारणका लागि बिक्री वितरण गरिनेछ ।

तिब्बती मार्ग भएर ढुवानी भएर आउने खाद्यान्न हवाई मार्गको खाद्यान्नभन्दा ढुवानी दर सस्तो पर्नेछ । उहाँले काठमाडौँ, केरुङ, तिब्बत र हिल्सा हुँदै सिमकोट पुगेको खाद्यान्न प्रति क्विन्टल सात हजार पाँच सय, नाम्खा गाउँपालिकाको याल्वाङसम्म ढुवानी हुने प्रति क्विन्टल खाद्यान्न चार हजार आठ सय रुपियाँ ढुवानी लाग्नेछ । जब कि नेपालगन्जबाट हवाई मार्गबाट ढुवानी हुने खाद्यान्नको हवाई भाडा प्रति क्विन्टल सोह्र हजार लाग्ने गर्छ भने सुर्खेतबाट प्रति क्विन्टल पन्ध्र हजार पाँच सय रुपियाँ लिमिटेडले तिर्दै आएको छ ।