नेपालगन्ज– १० दिन अघि भैंसी चराउन गएकी बर्दिया राजापुर नगरपालिका– १० का ६५ वर्षीया लालबहादुर थारुलाई बाघले मारेको त्रास स्थानीयको मनमस्तिष्कमा ताजै छ । उक्त त्रासका बीच मधुवन नगरपालिका– ३, स्थित सामुदायिक वनभित्र घाँस काट्न गएकी २७ वर्षीया युवतीलाई बाघले मारेको छ । कोठियाघाट बजारकी २७ वर्षीया रिना सुनारको पाटेबाघले आक्रमणबाट ज्यान गएको प्रहरीले जनाएको छ ।

बर्दियामा बाघ आक्रमणका घटना बढ्न थालेपछि स्थानीय त्रसित बनेका छन् । पाटेबाघ आक्रमणका घटना दिनहुँ बढिरहेकाले बर्दिया राष्ट्रिय निकुञ्ज तथा डिभिजन वन कार्यलयले सूचना निकालेर वन र सामुदायिक वनमा गाईभैँसी चराउन तथा घाँसदाउरा लिन नजान पटक–पटक आग्रह गरिरहेको छ ।

चालु आर्थिक वर्षमा बर्दियामा मात्रै बाघको आक्रमणबाट ८ जनाको मृत्यु भएको छ ।