नेपालगन्ज –जन्मदिनमा केक काटेर, भोज भतेर गरी फजुल खर्च गरेर मनाउने विकृति बढिरहेका बेला नेपालगन्ज उपमहानगरपालिका– १० भृकुटीनगर बस्ने किरण भट्टले अनाथाश्रममा रहेका बालबालिकासँग खुसी बाँड्दै आफ्नो जन्मदिन मनाएका छन् ।
नेपालगन्ज स्थित जुनीयर आइस्टाइन एकेडेमीमा कक्षा ८ मा अध्ययनरत भट्टले अनाथाश्रममा रहेका बालबालिकालाई खाद्यान्नलगायत दैनिक उपभोग्य सामाग्री वितरण गरेका हुन् । नेपालगन्ज स्थित समाज विकास तथा प्रवद्र्धन केन्द्र बाँकेद्वारा सञ्चालित अनाथ असहाय तथा सडक बालबालिका संरक्षण केन्द्रमा रहेका १४ जना बालबालिकालाई सो सामाग्री सहयोग गरिएको हो । भट्टले जन्मदिनको लागि खर्च गर्ने रकमबाट बालबालिकालाई २५ किलो चामल, ४ किलो दाल, १४ जनालाई एक÷एक पिस टुथपेस्ट र ब्रस वितरण गरेका छन् ।
जन्मदिनमा केक काटेर खर्च गर्नुको साटो आफू जस्तै साथीहरुलाई सामाग्री सहयोग गर्न पाउँदा खुसी लागेको किरणले बताए । बालबालिकालाई खाद्यान्न तथा सामाग्री किरण भट्ट, बुवा हेमराज भट्ट र आमा महेश्वरी भट्टले वितरण गरेका थिए । सामाग्री वितरण कार्यक्रमका बोल्दै गैरसरकारी संस्था महासंघ बाँकेका अध्यक्ष तथा बासका कार्यकारी निर्देशक नमस्कार शाहले सानो उमेरमै सेवाको भावना विकास हुनु अन्य बालबालिकाका लागि उदाहरणीय हुने बताए । सामाग्री वितरण पश्चात् बोल्दै अनाथाश्रमका सञ्चालक मिन अर्यालले बावु किरणले सानो उमेरमा बालबालिकाका बीचमा जन्मदिन मनाउनु अनुसरणयोग्य कार्य भएको बताए । उनले घरमै आएर बालबालिकालाई सामाग्री वितरण गर्ने सकारात्मक कार्यको प्रशंसा गरे । बासका निर्वतमान अध्यक्ष मन भण्डारीले सञ्चालन गरेको सामाग्री वितरण कार्यक्रममा सहयोग सामाग्रीका बारेमा जानकारी बासका निर्देशक तथा किरणका बुवा हेमराज भट्टले दिएका थिए । सो क्रममा बासका कार्यक्रम संयोजक रविन्द्र बोहरा, लेखा अधिकृत अनिल थापा मगर, कार्यक्रम अधिकृत शुद्ध चौधरीको उपस्थिति रहेको थियो ।
