बाँके– बलात्कार घटनाका पीडितलाई मानव अधिकार सहायता कक्षले माघ १६ गते सहयोगबापत १० हजार रुपैयाँ हस्तान्तरण गरेको छ । डिसिएको सहयोगमा इन्सेक नेपालगन्जमा सचिवालय रहेको मानव अधिकार सहायता कक्षको माघ १५ गते बसेको बैठकले बलात्कार पीडित १४ वर्षीया बालिकाको उपचार सहयोग गर्ने निर्णय गरेको थियो ।
मानव अधिकार सहायता कक्षका सदस्य एवम् गैसस महासंघ जिल्ला शाखा अध्यक्ष नमस्कार शाहले पीडितका बुवालाई उक्त रकम हस्तान्तरण शुक्रबार हस्तान्तरण गरेका छन् । बौद्धिक अपाङ्गता भएकी बालिकालाई अपरिचित व्यक्तिले बलात्कार गरेको भन्दै पीडितका बुवाले कानुनी तथा स्वास्थ्य उपचारमा आवश्यक सहयोग गरिदिन भन्दै इन्सेक लुम्बिनी प्रदेश कार्यालय, नेपालगन्जमा पुस २३ गते निवेदन दिएका थिए । बालिका बिरामी भएपछि पुस १८ गते शिक्षण अस्पताल, कोहलपुरमा उपचारको क्रममा आठ हप्ताको गर्भ रहेको चिकित्सकले बताएपछि बलात्कृत भएको जानकारी पाएको पीडितका बुवाले बताए ।
इन्सेकको सिफारिसमा पीडितको पुस २३ गते भेरी अस्पताल नेपालगन्जमा उपचार गरिएको थियो भने इन्सेककै सहयोगमा पीडितपक्षले इलाका प्रहरी कार्यालयमा पुस २२ गते उजुरी दर्ता गराएका थिए । आरोपितलाई पीडितले नचिनेका कारण आरोपित को हो ? भन्ने कुरा नखुलेको इलाका प्रहरी कार्यालयका सई रणधीर जैसीले बताए । पीडित बालिकाको स्वास्थ्य अवस्था कमजोर रहेकोले थप उपचारको लागि सहयोग रकम प्रदान गरेको इन्सेक लुम्बिनी प्रदेश प्रमुख भोला महतले बताए । सहयोग रकम बुझ्दै पीडितका बुवाले प्राप्त रकमले छोरीको थप उपचारमा सहयोग पुग्ने बताएका छन् ।
