देबिदत्त आचार्य
संघिय अध्यक्ष, राष्ट्रिय अपाङ्ग महासंघ नेपाल
१. तपाईंको नेतृत्वमा रहेको संस्थाले हाल के–के कार्यक्रमहरु संचालन गरिरहेको छ?
– हाल हाम्रो संस्था राष्ट्रिय अपाङ्ग महासंघ नेपालले अपाङ्गता भएका व्यक्तिहरूको हकहितका लागि विभिन्न कार्यक्रमहरु संचालन गरिरहेको छ । जसमा प्रमुख रुपमा शिक्षा, स्वास्थ्य र रोजगारीका अवसरहरु प्रदान गर्ने कार्यक्रमहरु छन् । स्वास्थ्य क्षेत्रमा, निःशुल्क स्वास्थ्य शिविरहरुको आयोजना गर्दै अपाङ्गता भएका व्यक्तिहरूलाई स्वास्थ्य सेवामा सहज पहुँचको व्यवस्था गरेका छौं । साथै, सीप विकास तालिमहरु मार्फत उनीहरूको आत्मनिर्भरता बढाउन मद्दत गर्दै आएका छौं।
२. यहाँहरुको कुन–कुन संस्था, निकायसँग सहकार्य रहेको छ?
– हाम्रो संस्था विभिन्न राष्ट्रिय र अन्तर्राष्ट्रिय संघसंस्थाहरूसँग सहकार्य गर्दै आएको छ । संघीय स्तरमा, हामी समाज कल्याण परिषद्, महिला, बालबालिका तथा ज्येष्ठ नागरिक मन्त्रालय, अपाङ्गता अधिकारका लागि काम गर्ने अन्य गैरसरकारी संस्थाहरु र स्थानीय सरकारहरूसँग समन्वय गर्दै आइरहेका छौं । अन्तर्राष्ट्रिय रुपमा, हामी युनेस्को, युनिसेफ, डीपिओडी‚ सिबिएम ग्लोबल नेपालका साथै युएनडिपी जस्ता संस्थाहरुका साथमा साझेदारीमा गरिरहेका छौं । यसका साथै स्थानिय स्तरमा सञ्चालित अपाङ्गता भएका व्यक्तिहरु द्धारा सञ्चालित संस्थाहरु सँग समेत सहकार्यमा छौ ।
३. यहाँहरुले कसका लागि कहाँ–कहाँ काम गरिरहनु भएको छ?
– हामी मुख्यतः अपाङ्गता भएका बालबालिका, युवा, र वृद्धवृद्धाहरुका लागि काम गरिरहेका छौं । हाम्रो काम नेपालको विभिन्न क्षेत्रहरुमा फैलिएको छ‚ राष्ट्रिय अपाङ्ग महासंघ नेपालका ४०० वटा सदस्य संस्थाहरु रहेका छन् जो देशैभरि फैलिएका हुनाले देशका विभिन्न ग्रामीण र दुर्गम भेगहरुमा काठमाडौँ उपत्यका, तराईका जिल्ला, पहाडी क्षेत्र र हिमाली जिल्लाहरुमा समेत हाम्रो उपस्थिति रहेको छ ।
४. सामाजिक क्षेत्रमा काम गर्दा के–के चुनौतीहरु सामना गर्नु परेको छ?
– सामाजिक क्षेत्रमा काम गर्दा विभिन्न चुनौतीहरु सामना गर्नु परेको छ । प्रमुख चुनौती भनेको आर्थिक स्रोतको अभाव हो । आवश्यक पर्ने आर्थिक सहयोग समयमै प्राप्त नहुनु, जनचेतना अभावले गर्दा अपाङ्गता भएका व्यक्तिहरूको हकहितको बारेमा समाजमा सकारात्मक परिवर्तन ल्याउन गाह्रो हुनु र सरकारी नीतिहरूको प्रभावकारी कार्यान्वयनको कमी पनि मुख्य चुनौतीहरू हुन् ।
५. आगामी योजना र कार्यक्रम के छ ?
– आगामी दिनहरुमा हामीले अपाङ्गता भएका व्यक्तिहरूको जीवनस्तर सुधार गर्ने दीर्घकालीन योजनाहरु बनाएका छौं । शिक्षा क्षेत्रमा, अझ बढी विशेष विद्यालयहरु खोल्ने योजना छ । स्वास्थ्य क्षेत्रमा, दूरदराजका क्षेत्रहरुमा मोबाइल स्वास्थ्य क्लिनिक संचालन गर्ने योजना बनाएका छौं । रोजगारीको अवसर बढाउन, सार्वजनिक र निजी क्षेत्रसँग सहकार्य गर्दै रोजगारी मेलाहरुको आयोजना गर्ने योजना छ । साथै, डिजिटल प्रविधिको उपयोग गरेर अपाङ्गता भएका व्यक्तिहरूलाई स्वावलम्बी बनाउने तालिमहरुका साथ साथै पहुँचयोग्य सेवाहरु विकास र विस्तार गर्ने कार्यक्रमहरु पनि सञ्चालन गर्ने तयारीमा छौं ।
६. अन्तमा के भन्नु हुन्छ?
– अन्त्यमा, म सम्पूर्णलाई आग्रह गर्न चाहन्छु कि अपाङ्गता भएका व्यक्तिहरूको हक र अधिकारलाई सम्मान गर्दै उनीहरूको सशक्तिकरणमा सहयोग गरौं । सबैको साथ र सहयोगले मात्र समावेशी समाजको निर्माण सम्भव छ । हाम्रो संस्थाको प्रयासमा तपाईँहरूको निरन्तर सहयोग र साथको अपेक्षा छ । धन्यवाद ।
