नेपालगन्ज । बाँकेको डुडुवा गाउँपालिका स्वास्थ्य सेवा अन्र्तगतको कार्य सम्पादनमा जिल्ला मै उत्कृष्ट भएको छ ।
आर्थिक वर्ष २०८१/०८२ मा स्वास्थ्य सूचकहरुको आधारमा प्राप्त कुल ७९.३६ अंकका साथ डुडुवा गाउँपालिका सर्वोत्कृष्ट भएको हो ।
प्रथम भएको डुडुवा गाउँपालिकालाई एक कार्यक्रमका बिच लुम्बिनी प्रदेशका स्वास्थ्य मन्त्री खेमबहादुर सारु, स्वास्थ्य सचिव दुर्गा लक्ष्मी श्रेष्ठ, स्वास्थ्य निर्देशनालयका निर्देशक रोशन चौधरी, स्वास्थ्य कार्यालय बाँकेका प्रमुख सुनिता पौडेलले उत्कृष्ट प्रमाणपत्रसंगै गाउँपालिकाका स्वास्थ्य शाखा प्रमुख सिताराम चौधरीलाई दोसल्ला ओढाएर सम्मान गरिएको छ ।
स्वास्थ्य कार्यालय बाँकेले नेपालगन्जमा आयोजना गरेको ‘स्वास्थ्य सेवा तथा कार्यक्रमहरुको प्रथम चौमासिक अवधिको समिक्षा तथा कार्ययोजना गोष्ठी’ मा उत्कृष्ट पालिकाहरुलाई सम्मान गर्ने क्रममा डुडुवालाई सम्मान गरिएको हो ।
स्वास्थ्य सेवा तथा कार्यक्रमहरुको आधारमा डुडुवाले सबै भन्दा बढी अंक ल्याएर सर्बोत्कृष्ट भएको स्वास्थ्य कार्यालय बाँकेका फोकल पर्सन नरेशबाबु श्रेष्ठले जानकारी दिएका छन् ।

जिल्लामा डुडुवा गाउँपालिकाले विगतका वर्षदेखि नै स्वास्थ्य क्षेत्रलाई पहिलो प्राथमिकतामा राखी काम गर्दै आएको गाउँपालिका स्वास्थ्य शाखाले जनाएको छ । गाउँपालिकाले घर घरमा स्वास्थ्य सेवा अभियान संचालन गर्दै आएको छ । पालिकाका चार वटा स्थानमा निशुल्क प्रयोगशाला, जेष्ठ नागरिक गाउँपालिका अध्यक्ष कार्यक्रम, दुई वटा एम्बुलेन्सको व्यवस्था, सबै स्थानमा सुविधा सम्पन्न आधारभुत सेवा, टाढा तथा सेवाबाट बञ्चितीकरणमा परेको गाउँमा थप स्वास्थ्य एकाइको स्थापना, सामुदायिक आँखा उपचार केन्द्र, नेपाल सरकारले उपलब्ध गराउने औषधी बाहेक थप मधुमेह, प्रेसर, तथा जटिल रोगको उपचारका लागि निशुल्क औषधीको व्यवस्था, गाउँघर क्लिनिक, खोप, प्रसुती सेवा र स्वास्थ्य समस्या आउने वित्तिकै घरमै स्वास्थ्यकर्मीद्धारा सेवा प्रदान जस्ता कार्यक्रम गर्दै आएको गाउँपालिका अध्यक्ष नरेन्द्रकुमार चौधरीले बताए । अध्यक्ष चौधरीका अनुसार विपन्न नागरिकलाई आखा उपचार तथा शल्यक्रियामा सहयोग, नागरिक आरोग्य केन्द्र, हिरिमिनिया, कम्दी र बनकट्टीमा घुम्ती रुपमा गर्भवती महिलाको भिडियो एक्स–रे र बेतहनीमा दैनिक सेवा संचालन, पाँच शैययाको आधारभुत अस्पताल संचालनको तयारी गरिएको छ ।
यसैगरि ७५.२१ अंकका साथ जानकी गाउँपालिका दोस्रो र ७५.२१ अंकका साथ खजुरा गाउँपालिका ७१.९७ अंक सहित तेस्रो स्थान हासिल गर्न सफल भएका छन् ।