घोडाघोडी (कैलाली), २९ पुस
कैलालीको घोडाघोडी नगरपालिका–१, सुखडमा लैंगिक समानता, अपाङ्गता तथा सामाजिक समावेशिकरण सम्बन्धी रिफ्लेक्सन कार्यशाला गोष्ठी आज सम्पन्न भएको छ । गोष्ठीको सहजीकरण मर्सिकोर नेपालका बरिष्ट जेसी अधिकृत संगिता अधिकारीले गर्नुभएको थियो । कार्यक्रममा घोडाघोडी नगरपालिकामा हाल लैंगिक समानता, अपाङ्गता तथा सामाजिक समावेशिकरणको अवस्था कस्तो छ, विद्यमान चुनौतीहरू के–कस्ता छन् र आगामी दिनमा यस क्षेत्रलाई थप प्रभावकारी बनाउन कस्ता योजना तथा कार्यक्रम अघि बढाउन सकिन्छ भन्ने विषयमा छलफल गरिएको थियो ।
कार्यक्रममा बोल्दै घोडाघोडी नगरपालिकाका नगर प्रमुख खडक रावतले नगरपालिकाका आगामी योजना तथा कार्यक्रमहरूमा लैंगिक समानता, अपाङ्गता र सामाजिक समावेशिकरणलाई प्राथमिकताका साथ समेटिने बताउनुभयो । उहाँले हाल धेरै क्षेत्रमा अझै पनि समावेशिताको अवस्था सन्तोषजनक नभएको स्वीकार गर्दै नीति निर्माणदेखि कार्यान्वयनसम्म समावेशी दृष्टिकोण अपनाउन आवश्यक रहेकोमा जोड दिनुभयो । मर्सिकोर नेपाल र सेवक नेपालको आयोजनामा सम्पन्न उक्त गोष्ठीमा सरोकारवाला निकाय, स्थानीय तहका प्रतिनिधि, पत्रकार लगायतको सहभागिता रहेको थियो ।