राष्ट्रपति रामचन्द्र पौडेलले रसुवामा आएको विनाशकारी बाढीबाट उत्पन्न विपत्तिको सामना गर्न राजनीतिक दलदेखि आम नागरिकसम्म सबै पक्षलाई एकताबद्ध भएर अघि बढ्न आह्वान गरेका छन्।
सोमबार बाढी प्रभावित क्षेत्रको स्थलगत निरीक्षण गरेपछि राष्ट्रका नाममा सम्बोधन गर्दै राष्ट्रपति पौडेलले विपत्तिबाट प्रभावित नागरिकको उद्धार, राहत, पुनःस्थापना तथा पुनर्निर्माणका लागि राज्यका सबै संयन्त्र र सामाजिक शक्तिहरूबीच सहकार्य आवश्यक रहेको बताए।
उनले राजनीतिक दल, निर्वाचित जनप्रतिनिधि, नागरिक समाज, मानवीय सहायता तथा उद्धारमा संलग्न संघसंस्था, निजी क्षेत्र, व्यवसायी समुदाय र आम नागरिकलाई संकटको समयमा एकजुट भएर पीडितको साथमा उभिन आग्रह गरे। विपत्तिको यस्तो कठिन परिस्थितिमा राजनीतिक विवाद, आरोप–प्रत्यारोप र विभाजनमा केन्द्रित हुनुभन्दा राष्ट्रिय एकता र आपसी ऐक्यबद्धतालाई प्राथमिकता दिनुपर्ने राष्ट्रपति पौडेलको भनाइ छ।
‘यो विभाजनको समय होइन । एकअर्कालाई दोषारोपण गर्ने वा राजनीतिक विवाद र टकरावमा अल्झिने समय पनि होइन । यो राष्ट्रिय एकता तथा ऐक्यबद्धता प्रदर्शन गर्ने समय हो,’ उनले भने। राष्ट्रपति पौडेलले विपत्तिबाट तत्कालीन राहत र उद्धारसँगै दीर्घकालीन पुनर्निर्माण तथा पुनःस्थापनालाई पनि प्राथमिकतामा राख्नुपर्ने बताए। प्रभावित क्षेत्रको भौतिक संरचना पुनर्निर्माण, विस्थापित नागरिकको पुनःस्थापना र प्रभावित अर्थतन्त्रलाई पुनःगतिशील बनाउन राज्यले विशेष योजना अघि बढाउनुपर्ने उनको जोड थियो।
उनले विपत्तिपछिको पुनर्निर्माणको क्रममा मुलुकको विद्यमान विकास मोडेलमाथि समेत पुनर्विचार गर्नुपर्ने आवश्यकता औंल्याए। प्राकृतिक विपद्को जोखिमलाई ध्यानमा राख्दै भविष्यमा सुरक्षित, दिगो र विपद् प्रतिरोधी विकास संरचना निर्माण गर्नुपर्ने उनको भनाइ छ।
‘यो समय पुनर्निर्माण, पुनःस्थापना र आर्थिक पुनरुत्थानको समय पनि हो,’ पौडेलले भने, ‘हामी पुनर्निर्माण, पुनःस्थापना र आर्थिक पुनरुत्थानको प्रक्रियामा जाँदै गर्दा हाम्रो विकास मोडेलमाथि पनि पुनर्विचार गर्ने हो कि भन्ने मलाई लागेको छ।’
राष्ट्रपति पौडेलको सम्बोधनले तत्काल उद्धार र राहतसँगै विपद्बाट सिकेर आगामी दिनमा जोखिम न्यूनीकरण, सुरक्षित पूर्वाधार निर्माण र दिगो विकासतर्फ राज्यको ध्यान केन्द्रित गर्नुपर्ने विषयलाई समेत जोड दिएको छ।









