रेशमविरुद्ध बहुविवाहको मुद्दा हाल्ने तयारीमा रञ्जिता

असल शासन प्रतिनिधि

काठमाडौं /नेकपाकी नेतृ रञ्जिता श्रेष्ठले पति रेशम चौधरीविरुद्ध बहुविवाहसम्बन्धी मुद्दा दर्ता गर्ने तयारी गरेकी छन्। सामाजिक सञ्जालमा उनले लामो समयको मौनता तोड्दै आफ्नो छोरा, अधिकार र आत्मसम्मानका लागि कानुनी बाटो रोजेको बताएपछि यसलाई धेरैले सम्बन्धविच्छेदको तयारीका रूपमा बुझेका थिए। तर, रञ्जिताले आफू डिभोर्सका लागि नभई बहुविवाहसम्बन्धी कानुनी प्रक्रिया अघि बढाउन लागेको स्पष्ट पारेकी छन्।

सामाजिक सञ्जालमा रञ्जिताले सम्बन्धको मर्यादा, परिवारको सम्मान र आफ्नो संस्कारका कारण आफूले वर्षौसम्म पीडा लुकाएर बसेको उल्लेख गरेकी छन्। आफ्नो छोराले बुबाको माया, साथ, समय र जिम्मेवारी पाउनुपर्ने उमेरमा त्यसको अभाव महसुस गर्नुपरेको भन्दै उनले त्यसले आफूलाई गहिरो पीडा दिएको बताएकी छन्।

‘मैले उसलाई कहिल्यै उसको बुबाविरुद्ध विष भरिनँ। उसको बालमनमा घृणा रोपिनँ,’ उनले लेखेकी छन्, ‘बच्चाले आमाबुबाबीचको विवादको भार बोक्नु हुँदैन। तर बुबा हुनु केवल सम्बन्धको नाम होइन—यो सन्तानप्रतिको जिम्मेवारी पनि हो।’ लामो समयसम्म मौन बसेपछि आफूले कानुनी बाटो रोजेको बताउँदै रञ्जिताले आफूले भोगेको विषयलाई प्रमाणसहित सम्बन्धित निकायसमक्ष राख्नु आफ्नो अधिकार भएको उल्लेख गरेकी छन्। उनका अनुसार यो कसैलाई अपमान गर्ने वा प्रतिशोध लिने अभियान नभई कानुनी प्रक्रियामार्फत विषय टुंग्याउने प्रयास हो।

उनले सामाजिक सञ्जालको बहसभन्दा कानुन र प्रमाणका आधारमा विषयको निरूपण हुनुपर्ने बताएकी छन्। आफूले कसैलाई दोषी घोषणा नगरेको र दोषी ठहर गर्ने अधिकार कानुनलाई मात्र रहेको उनको भनाइ छ। ‘म कसैलाई जेल पर्नुपरोस् भनेर श्राप दिँदिनँ। म कसैको जीवन बिग्रियोस् भनेर चाहन्नँ,’ उनले लेखेकी छन्, ‘तर कानुनले जे ठहर गर्छ, त्यसको जिम्मेवारी लिनुपर्ने समय आएमा त्यसबाट पछि हट्ने ठाउँ पनि हुँदैन।’

रञ्जिताको उक्त अभिव्यक्तिपछि सञ्चारमाध्यमले कानुनी कदमबारे सोध्दा उनले आफू रेशम चौधरीविरुद्ध बहुविवाहको मुद्दा दर्ता गर्ने तयारीमा रहेको बताएकी छन्। उनले लामो समयदेखि मौन बसे पनि पछिल्लो घटनाक्रमले आफूलाई थप पीडा दिएको बताएको समाचारहरूमा उल्लेख छ।

रञ्जिता रेशमकी पहिलो पत्नी हुन्। उनीहरूका एक छोरा छन्। पछिल्लो समय रेशम र रञ्जिता लामो समयदेखि अलग बस्दै आएको विभिन्न समाचारमा उल्लेख छ। रञ्जिता छोरासँग काठमाडौंमा र रेशम आशा चौधरी तथा छोरीसँग बर्दियामा बस्दै आएको विवरण सार्वजनिक भएका छन्।

रेशम र आशा चौधरीबीच दोस्रो विवाह भएको दाबी सार्वजनिक रूपमा हुँदै आएको छ। विभिन्न सञ्चारमाध्यमले उनीहरूको विवाह हालसम्म दर्ता नभएको उल्लेख गरेका छन्। यद्यपि, बहुविवाहसम्बन्धी आरोपको कानुनी निरूपण भने सम्बन्धित निकायमा उजुरी, प्रमाण, अनुसन्धान र अदालतको प्रक्रियाबाट हुने विषय हो।

रञ्जिताले कानुनी प्रक्रिया अघि बढाउने तयारी गरेको बताएसँगै लामो समयदेखि सार्वजनिक रूपमा देखिँदै आएको रेशम–रञ्जिता सम्बन्धको विवाद अब कानुनी प्रक्रियातर्फ जाने देखिएको छ। मुद्दा दर्ता भएपछि त्यसमा उठ्ने दाबी र प्रमाणका आधारमा सम्बन्धित निकायले आवश्यक प्रक्रिया अघि बढाउनेछ।

  • ३१ भाद्र २०८३, बुधबार प्रकाशित

  • Nabintech