ओए नेताज्यू

तिमी सभ्य सुकिला मुकिलालाई के थाहा

हामी पाखामा बस्ने पाखेहरुको व्यथा

तिम्रो असारे विकासले कोतरेको

हाम्रो पाखुराले थामेको भिरपाखो

असारे झरीले

गर्ल्यामगुर्लुम लड्दा

आफ्नाहरु गुमाउनुको पिडा

 तिमी त पुष्पक विमानमा सवार भएर

आकाशैबाट नजर डुलाउँछौ

नदीको भुईँमा छरिएका

गिट्टी बालुवामा आँखा लगाउँछौ

तर

त्यहि नदीको भेलमा बगेका

हामी भुईँमान्छेहरु कहाँ देख्छौ र

 कमिसनले ठडिएको कंक्रिटमा बिराजमान

तिमी हुकुमवासी

नदीको बगरमा लम्पसार

हामी सुकुम्बासी

यो असारे भेलले हामीलाई बगायो

पर्ख हनि हेर

चुनाबी भेलले तिमीलाई बगाउने छ ।