त्रिभुवन बिश्वबिद्धालयको चिकित्सा शिक्षा बाहेक अन्य सबै प्रवेश परिक्षाहरु समयमै सम्पन्न भई प्रथम सेमेष्टर पनि सकिन लाग्दा बल्ल चिकित्सा क्षेत्रको प्रवेश परिक्षा हुन लागेको सन्दर्भमा प्रथमतः परिक्षा केन्द्रको विवाद र अहिले आएर परिक्षार्थीरुले बहत्तर घण्टा भित्रको पिसिआर टेस्ट निगेटिभ आएको रिपोर्ट पेश गर्नुपर्ने र परिक्षा केन्द्रमा दुई तीन घण्टा अगाडि नै उपस्थित हुनुपर्ने आदि नियमहरु थोपरेर कक्षा बाह्र उतिर्ण गरि लामो समय देखि तयारी गरिरहेका,अलमलमा परिरहेका ती हजारौं बिद्यार्थी र अभिभावकहरु माथि अनावश्यक मनोबैज्ञानिक दवाव, चिन्ता, झन्झट र बोझ थपेको छ।
एउटै बिद्यार्थीले दुई तीन वटा सम्म बिषय प्रवेश परिक्षा दिने भएको हुँदा कम्तीमा एक हप्ता सम्म पिसिआर रिपोर्ट मान्ने हुनुर्छ । अन्यथा, बिद्यार्थीले प्रवेश परिक्षा अवधिमै फेरि बारम्बार पिसिआर टेष्ट गराइरहनु पर्ने हुन्छ जुन अत्यन्त अब्यवहारिक,अप्ठ्यारो र झन्झटपुर्ण देखिन्छ । बिद्यार्थीहरु परिक्षाको तयारी गर्ने कि पिसिआर गराउँदै हिड्ने ? कहाँ गएर गराउने, रिपोर्ट कति दिनमा आउने र खर्चको पनि कुरा हुन्छ।
त्रि.बि. को अरु नियमित परिक्षाहरुमा यस्तो नियम लगाइएको छैन । फेरि किन चिकित्सा शिक्षा प्रवेश परिक्षामा मात्र कहिँ नभएको जात्रा हाडिगाउँँमा गर्नु परेको होला ? एउटै ब्याचका साथीहरू स्नातक तहका अन्य बिषयहरुमा प्रथम सत्र पूरा गर्दै गर्दा चिकित्सा सेवा आयोगको प्रवेश परिक्षा पर्खेर बसेका ती हजारौं बिद्यार्थीहरु माथि यो सरासर अनुचित छ, अनावश्यक छ र अन्यायपूर्ण छ।
त्यसैले, सम्वन्धित सबैको यसमा गम्भीर ध्यानाकर्षण होस् । बिद्यार्थी हकहितमा काम गर्ने संघसंगठनहरुले पनि यो मुद्दा लाई उचित ढंगले सम्बोधन हुने गरी दवाव दिन जरुरी छ । स्वास्थ सुरक्षाका अन्य उपायहरू जस्तै : भौतिक दुरि कायम गर्ने, अनिवार्य मास्क लगाउने र परिक्षा केन्द्रमा स्यानिटाइजर वा साबुन पानीको उचित ब्यवस्था गरियोस् तर यो बहत्तर घण्टा सम्म मात्र पिसिआर रिपोर्ट मान्ने हुने र बिध्यार्थी, परिक्षार्थीहरुले पटक, पटक पिसिआर टेष्ट गर्नुपर्ने जस्तो अब्यवहारिक नियम हटाइयोस्, नबनाइयोस, यसरी उपर माथि थुपर भनेझैं चिकित्सा शिक्षामा प्रवेश परिक्षा दिन बसेका हजारौं बिद्यार्थीहरुलाई बोझ माथि बोझ नथोपरियोस् । चेतना भया ।
